Песнопения службы Рождества Христова

Тропарь, глас 4-й

Рождество Твое, Христе Боже наш, возсия мирови свет разума: в нем бо звездам служащии, звездою учахуся, Тебе кланятися Солнцу правды, и Тебе ведети с высоты Востока: Господи, слава Тебе.

Кондак, глас 3-й

Дева днесь Пресущественнаго раждает, и земля вертеп Неприступному приносит, ангели с пастырьми славословят, волсви же со звездою путешествуют: нас бо ради родися Отроча Младо, Превечный Бог.

 Величание:

Величаем Тя, Живодавче Христе, нас ради ныне плотию Рождшагося от Безневестныя и Пречистыя Девы Марии.

Орнамент Рождество Христово

Рождественский канон:

Песнь 1.

Ирмос и Катавасия: Христос раждается, славите. Христос с небес, срящите. Христос на земли, возноситеся. Пойте Господеви вся земля, и веселием воспойте людие, яко прославися.

Песнь 3.

Ирмос и Катавасия: Прежде век от Отца рожденному нетленно Сыну, и в последняя от Девы воплощенному безсеменно Христу Богу возопиим: вознесый рог наш, Свят еси Господи.

Песнь 4.

Ирмос и Катавасия: Жезл из корене Иессеова, и цвет от него, Христе, от Девы прозябл еси, из горы хвальный, приосененныя чащи, пришел еси воплощься от Неискусомужныя Невещественный Боже: слава силе Твоей, Господи.

Песнь 5.

Ирмос и Катавасия: Бог сый мира, Отец щедрот, Великаго Совета Твоего Ангела, мир подавающа, послал еси нам: тем Богоразумия к свету наставльшеся, от нощи утренююще, славословим Тя, Человеколюбче.

Песнь 6.

Ирмос и Катавасия: Из утробы Иону младенца изблева морский зверь, якова прият: в Деву же всельшееся Слово, и плоть приемшее, пройде сохраньшее нетленну, Егоже бо не пострада истления, Рождшую сохрани неврежденну.

Песнь 7.

Ирмос и Катавасия: Отроцы благочестию совоспитани, злочестиваго веления небрегше, огненнаго прещения не убояшася, но посреди пламене стояще пояху: отцев Боже благословен еси.

Песнь 8.

Ирмос и Катавасия: Чуда преестественнаго, росодательная изобрази пещь образ, не бо яже прият палит юныя, яко ниже огнь Божества Девы, в Нюже вниде утробу. Тем воспевающе воспоем: да благословит тварь вся Господа и превозносит во вся веки.

Песнь 9.

Ирмос и Катавасия: Таинство странное вижу и преславное: небо, вертеп: Престол Херувимский, Деву: ясли, вместилище, в нихже возлеже Невместимый Христос Бог, Егоже воспевающе величаем. 

Припев всех Песней Канона:

Слава, Господи, Святому Рождеству Твоему.

***

Скачать буклет Храма иконы Иверской Божией Матери с песнопениями службы Рождества Христова